Print

Upang palakasin ang pagpapatupad ng environmental laws ay magdaragdag ng apat na field offices sa Metro Manila ang Department of Environment and Natural Resources (DENR) dahil na rin sa patuloy na paglobo ng populasyon sa Kalakhang Maynila na aabot na ngayon sa mahigit 12 milyong residente.

Ayon kay DENR Secretary Roy A. Cimatu, ang hakbang na ito ay base na rin sa pagsisikap ni Pangulong Rodrigo Duterte na ilapit sa tao ang serbisyo ng gobyerno partikular na ang mga naninirahan sa National Capital Region (NCR).

“The creation of the four field offices in the DENR-NCR aims to strengthen the enforcement of environment and natural resources laws and promote focused and area-based operations,” nakasaad pa sa nilagdaang DENR Administrative Order No. 2019-02 ni Cimatu kamakailan.

“Thus, this brings the programs, projects, and services of the department closer to the public,” dagdag pa nito.

Kasabay nito, sinabi pa ni Cimatu na ang pagdagdag ng mga bagong field offices ay upang magkaroon ng koordinasyon ang DENR at ang iba pang ahensiya ng gobyerno kabilang na dito ang mga local government units (LGUs) sa Metro Manila na naatasan ng Supreme Court (SC) na linisin ang Manila Bay.

Ang bawat field office ay may kanya-kanyang hurisdiksiyon sa 16 na lungsod at isang munisipalidad sa Metro Manila.

Magiging hurisdiksiyon ng DENR-North Metro Manila Field Office ang CAMANAVA area (Caloocan-Malabon-Navotas-Valenzuela) habang ang South Metro Manila Field Office naman ay hahawakan ang Taguig, Parañaque, Las Piñas, Muntinlupa at Pateros.

Ang Quezon City naman kasama ang Marikina City at Pasig City ay mapapaloob sa East Metro Manila Field Office samantalang ang mga lungsod ng Manila, San Juan, Mandaluyong, Makati at Pasay ay mapapasama sa West Metro Manila Field Office.

Sinabi pa ni Cimatu, bukod sa east office, magkakaroon ng sub-station ang bawat field offices para sa implementasyon ng mga aktibidad ng isinasagawang rehabalitasyon sa Manila Bay.

Ang apat na field offices ay direktang mamanduhan ng DENR Regional Executive Director for NCR, ang bawat isang tanggapan ay pamumunuan ng Chief Environmental Officer at deputy nito, na magkakaroon ng tatlong sections na kinabibilangan ng Monitoring and Enforcement Section, Conservation and Development Section at Permitting and Regulation Section.

Tungkulin ng Monitoring and Enforcement Section ang pagmonitor kung sumusunod sa batas sa forestry, wildlife at iba pang environmental laws ang bawat lugar. Kabilang din sa trabaho nito ang magsagawa ng surveillance at investigation activities.

Magiging obligasyon naman ng Conservation and Development Section ang mga aktibidad sa protected areas and biodiversity, urban forestry, coastal resource and foreshore at community relations development.

Ang pag-iisyu naman ng permits at iba pang kinakailangang dokumento para sa forestry at wildlife ang magiging gawain ng Permitting and Regulation Section.

Lumalabas sa isinagawang survey ng national census noong 2015, umabot na sa 12,877,253 ang populasyon ng Metro Manila na may pinakamaliit na region sa bansa kung ang pag-uusapan ay ang land area. ###